政情：陳恒鑌減肥減到病 仲想練腹肌
好多人都對自己嘅身形唔滿意，連立法會議員陳恒鑌（Ben）都係一樣。阿Ben為咗減甩自己啲肥肉，最近都好落力減肥，但係因為太落力，搞到自己有胃病呀！
尋日見到阿Ben，瘦咗好多喎。佢話當初開波減時一百八十六磅，本來目標係諗住減到一百七十五磅，點知減到上咗癮，做gym之外仲自己減量減餐，結果搞到兩個月前開始胃痛要睇醫生。
抖多排會操番
嘩！搞成咁呀！佢話醫生要佢抖吓，所以近排暫停健身，依家就好想肥番啲，因為老婆詐型話佢太瘦，佢就好開心話依家可以着slim fit嘅衫褲，抖多排就會操番，話肥腩減咗只要keep住操，六舊朱古力都指日可待。
佢仲話依家終於有啲明白「女人心」，今次嘅減肥經歷令自己知道，減肥唔可以過度，呼籲大家如果減肥一定要搵專業人士幫手，唔好自己夾硬嚟呀！