政情：入三跑諮詢會 彭耀佳成新公職王
香港總商會前主席彭耀佳又有新公職，獲委任航空發展與機場三跑首系統諮詢委員會委員，任期由今年八月一日起生效，任期兩年。話時話，彭耀佳四月初上任香港旅遊發展局主席，加埋其他多項公職，可謂係新嘅公職王。
身兼六職 已到頂點
彭耀佳唔單止掌旅發局，同時亦身兼多項公職，包括公務員薪俸及服務條件常務委員會、首長級薪俸及服務條件常務委員會、資優教育諮詢委員會主席同工業貿易諮詢委員會委員，再加埋今次三跑諮詢委員會，總共有六項公職在身。以政府不成文嘅「六六規定」，即係同時只可身兼六個委員會同六年任期，彭耀佳身兼六項公職，已到頂點。
其實，政府尋日公布包括彭耀佳在內七名新委員，當中莊冬瑩同黃文亨係透過青年委員自薦計劃獲得委任，而委員會現有十六名委員則再度獲委任。