政情：會議取消無睇電郵 黃偉賢 杜嘉倫摸門釘發難

會議原定喺朝早十點開始，大約喺大概十點半至十一點，我哋就「野生捕獲」咗兩位區議員。杜嘉倫話呢排好多嘢做，雖然今次白行一趟，但知道冇會開都忍唔住鬆咗口氣。反而黃偉賢就比較激動，仲即場打電話「質詢」小組主席姚國威添！

剛發生元朗暴力事件 恐釀亂

姚國威就向黃解釋，會議議程會有港鐵代表出席，驚有議員會喺開會期間猛問港鐵代表七月廿一日元朗站白衫軍襲擊事件，有機會造成混亂，又話依家呢個時候唔適合開會，所以先臨時臨急通知議員會議取消。唔緊要啦，要追問港鐵代表唔一定要等開會嘅，唔知黃偉賢同杜嘉倫之後會唔會去九龍灣（港鐵總部位置）食個靚早餐呢？

其後我哋打電話向姚國威查證，佢解釋元朗暴力事件喺上星期都仲係討論得好熱烈，存在好多不安全因素，認為喺咁嘅氣氛下唔適合開會，「上星期好難估到星期一（元朗）仲有冇事o架嘛」，所以決定喺上周四通知秘書處發電郵通知各議員取消會議。

小組主席姚國威為事件道歉

至於有議員「摸門釘」冇會開，姚國威即刻「耍冧」，承認自己處理得未夠好，又話除咗集體運輸服務小組外，其實天水圍北泳池工程進度工作小組會議都叫停咗，但呢個「泳池小組」就有一個WhatsApp群組畀議員們交流，佢就有喺呢個群組通知大家，但集體運輸服務小組就冇建立到WhatsApp群組，加上佢唔記得叫秘書打電話通知議員唔使開會，所以先要議員們白行一趟。

其實，秘書處都已經電郵咗畀議員話取消會議，只係黃偉賢同杜嘉倫冇睇到，所以佢哋本身都有甩漏，而姚國威亦承認做少咗啲嘢，相信下次會再小心啲，兩位「摸門釘」議員咪當做吓運動囉！