政情：鍾國斌澳洲大開眼界 研究室唔接單「嘥晒」
香港地少人多，真係好多嘢都好有限制，好似立法會紡織及製衣界議員鍾國斌（Felix）喺社交網站貼文，見到佢去咗澳洲考察，但係一去到當地做研究嘅地方就嘆晒氣話嘥晒，原來因為覺得嗰度可以接單做貨！
設計到成間紡織廠咁
Felix話，自己喺當地參觀做研究嘅地方，嗰度設計到成間紡織廠咁，同樣嘅地方，如果換轉喺香港，直頭可以接單做貨，覺得喺澳洲就嘥晒咁話。聽落外國地方果然大到可以想點就點，既然做研究嘅地方都咁似一間廠，相信研究水準都有番咁上下！
Felix此行仲去咗墨爾本兩間大學參觀，分別以時裝設計及以新材料為主，佢話，依家做製衣生意要做得好，好嘅設計同新物料呢兩個元素都必不可少，今次參觀呢兩間大學都覺得學到嘢，發現有啲嘢可以一齊合作用得着，覺得有機會都要出去見吓個世界咁話。唔知會唔會帶呢啲經驗畀香港業界呢？