中環出更：冇宗教信仰 馬清楠：風水係科學
唔少中國人買樓前都鍾意睇吓風水，保良局主席馬清楠早前出席保良局嘅關聖帝君寶誕祭祀典禮時，講起自己冇宗教信仰，不過會搵師傅睇吓風水，覺得風水係個人對環境嘅感覺，有數計o架，絕對係科學而唔係迷信咁話。
馬清楠話，大家有時會聽到人講，行入個單位會覺得周身唔聚財，搵風水術數專家睇過，再移動吓啲傢俬嘅位置之後，就成個舒服晒，正正就顯示風水係個人對環境嘅感覺。講番今次嘅祭祀典禮，其實農曆六月二十四日係關帝嘅誕辰，亦係香港非物質文化遺產之一，保良局每年依照慣例，喺總部內嘅關帝廳舉行關聖帝君寶誕祭祀典禮，今年由馬清楠代表主祭，佢都話呢個儀式係延續傳統而並非迷信。
馬清楠仲講番保良局嘅歷史，話保良局一直都秉承保赤安良為服務宗旨，以前權力好大，可以入屋搜查，因為當年拐帶婦女及孤兒情況嚴重，而每逢審理拐帶案、立誓同嫁娶等，都會喺呢個堂嘅關帝像前進行以示公正，所以到依家都保留奉祀關帝嘅傳統咁話。
出席儀式嘅仲有保良局前主席鄭錦鐘、副主席陳正欣同總理湯振傑等。講關於宗教，鄭錦鐘就話，自己拜神唸經同唱聖詩都冇問題，事關父母篤信佛教，自小就跟佢哋去佛寺，聽到佢哋唸經就跟住唸，讀書嗰陣又讀過天主教同基督教學校，所以成日都唱聖詩，仲話聖誕節有份演出耶穌出生嘅話劇，自己係飾演東方三博士帶頭嗰個，所以聖經故事都難佢唔到，雖然自己冇宗教信仰，不過佢就好識做，例如同媽咪去旅行，尤其去歐洲，當地有好多有歷史價值又保存得好靚嘅教堂，佢都會帶媽咪去參觀影吓相，但就會避開禮拜堂嘅時間，而媽咪都好大方，覺得咁靚嘅景色影吓相無妨。
陳正欣唔介意入鄉隨俗
副主席陳正欣就話自己會經常出外公幹，覺得雖然大家宗教或文化不同，但最緊要係互相尊重，如果係有理解過，而又符合常理嘅話，佢都唔介意入鄉隨俗嘅，但佢就提醒大家，千祈咪唔知頭唔知路，貪得意就跟人做，分分鐘冒犯咗人哋。
卓妮