政情：拒公開制服照及泳裝相 譚文豪令網民失望
身兼民航機師嘅立法會議員譚文豪（Jeremy），每年佢都會喺暑假搞講座，講吓考機師要準備乜嘢，日前佢喺社交網站發貼講今年講座資料時，唔少網民想睇佢着機師制服同泳裝相。我哋代表一眾網民問咗當事人攞相，好可惜，佢拒絕話唔會公開，同大家緣慳一面嘞！
暑假講座教考機師
至於問到考機師有乜嘢條件？Jeremy好認真解釋，有近視可以做機師，色弱就唔得，最重要係思考模式同做人態度，因為三萬呎高空上可以發生好多問題，要考一個人面對問題處理手法，甚至有冇膽指出上司嘅錯。佢又話試過半夜同考生傾電話，發現個同學仔講嘢冇自信，畀人感覺唔妥當，最終考試肥佬，所以叫大家最緊要夠膽。
至於係咪英文要好叻？佢就話要有一定水平，因為世界各地控制塔以英文交流為主，其中佢覺得印度人講嘢機關槍咁快，有時新人未必聽得好清楚o架！