政情：八網難逃：哈佛小甜甜中頭獎黐膠布

係就係個頭中招，但唔係佢本人個頭，而係佢掛喺街邊嘅橫額遭到破壞，橫額印上嘅頭像，額頭受傷了！點解？事關額頭遭人寫上粗口字句，但佢又唔想咁大嘥換咗成幅橫額，於是就黐塊膠布遮咗啲粗言穢語。

街坊問「佢係咪頭痛啊」

佢喺Facebook貼文，好調皮咁話「黐膠布快啲好吖嘛！」而佢落街加工黐膠布時真係有個阿伯問：「佢係咪頭痛啊？」認真搞笑！

呢個post出街之後，惹嚟好多網友熱議，當中唔少仲讚黐膠布好有創意，有網友更話：「不如你改黐退熱貼吖，消暑嘛！」亦有網友睇完，話：「笑咗！當娛樂吓啦！唔好激親。」

更有網友話：「招人妒忌，你的額頭生得比她/他好看！」不過，有網友就認為任葆琳應該報警，追究破壞橫額嘅人，仲有網友直指有關破壞橫額嘅事會陸續有嚟添！