中環出更：周宛賢山區做義工9日冇沖涼
依家愈嚟愈多女性唔單止兼顧事業同家庭，亦有唔少願意出力做善事回饋社會，亞太女企業家協會日前舉行第二屆就職晚宴，三位聯席會長周宛賢、徐懿靜同關琋鎂就分享咗自己家庭生活同做善事嘅樂趣。
做開鐘錶生意嘅周宛賢每年都會去其他國家，抽兩個禮拜「自私去」偏遠山區，幫助有需要嘅人，有次去到一個高海拔嘅地方，因為水源短缺問題，足足有九日冇沖涼。咁辛苦為咩？佢就話好多善長都捐錢，所以想特別啲出一分力幫人。
徐懿靜：陪小朋友成長好重要
周宛賢有三個仔女，佢話好慶幸其中兩個仔女喺佢事業上軌道嘅時候去外國讀書，等佢可以放心打理生意。當晚都有到場嘅二女Claudia放暑假返咗香港，佢話有跟媽咪去老人院做義工，又會一齊去主題樂園，媽咪玩得仲癲過佢同大哥同細佬。
從事公關行業嘅徐懿靜工作忙碌，老公Tommy對佢既要工作，又要照顧兩位年幼嘅小朋友同出席協會活動表示理解，「時間分配到係可以嘅」。徐懿靜又大談育兒之道，佢話細個嗰陣父母掛住返工冇咩點陪佢，令佢覺得陪小朋友成長係好重要，所以一得閒就會同佢哋去行山同溜冰。
關琋鎂本身係做特許經營顧問，佢話當初認識徐懿靜時係想搞「媽媽會」，結果最尾變咗做亞太女企業家協會，又話因為失婚等等嘅人生經歷，令好多會員都有所得着。
母兼父職嘅關琋鎂育有三個分別十二、十八同十九歲嘅囡囡，而佢嘅樂天性格，每日都想過啲開心嘅生活，對三個女都係咁，從來唔會強求成績，「對得住自己就夠」。
卓妮