中環出更：疑怕被網民玩殘 黎智英寓所急裝鐵絲圈
被指係違法佔領行動（佔中）「幕後黑手」同「金主」嘅壹傳媒黎智英（漢奸黎），不時唱衰香港被人詬病，近來有網民睇唔過眼，決定要將「連儂牆」發大，喺明日擴至漢奸黎位於何文田嘅屋企。漢奸黎寓所尋日就有人檢查閉路電視、加裝有倒刺嘅鐵絲圈，以及用白紗網蓋住間屋。唔知漢奸黎係咪驚被啲網民玩殘呢？
網民發起明貼「牆」
佔中搞手漢奸黎至今仍未落鑊，外界炮轟律政司司長鄭若驊給予保護傘，令佢繼續逍遙法外，同時亦令佢肆無忌憚，搞亂香港。漢奸黎早前同美國國務卿蓬佩奧及美國副總統彭斯會面，傾《逃犯條例》修訂同香港自治等議題，被官媒點名怒轟賣港。有網民就決定發大「連儂牆」，話會喺明日踩上位於漢奸黎屋企，講明見牆就貼，仲係撕一貼百，要求漢奸黎唔好唱衰香港。
漢奸黎寓所尋日下午三點半起，就有人擺低鐵絲圈等貨物，多名工人進行工程，包括牆上嘅鐵欄加裝一圈圈有倒刺嘅鐵絲，以及檢查閉路電視，又有工人喺漢奸黎間屋外蓋上白紗網，淨係尋日都搞咗近六小時。此外，尋日傍晚，其寓所內嘅車亦被駛走。網民嚟踩場前夕做咁多工程，唔通漢奸黎都怕咗民意？
卓妮