中環出更：王梓軒開演唱會 父王英偉親自撲飛撐場
明星嘅父母都冇特權o架，好似歌手王梓軒即將開個人演唱會，佢嘅爸爸、藝術發展局主席王英偉尋日出席一個藝術展時，講起自己都打算撐場支持吓囝囝，但係就話要自己撲飛喎！
王英偉話，自己喺演唱會唯一會幫嘅手就係撐場嘞，佢話阿仔大個仔，乜都自己搞得掂啦，做父母嘅咪去撐場支持吓囉，親身去就係最大嘅支持啦。聽落都對阿仔幾有信心咁！咁阿仔有冇留定飛呢？佢就話冇特別優待o架，上次都係自己去撲飛o架。嘩，依家啲演唱會飛咁難買，希望佢成功撲飛啦！
暑假又到，好多人都鍾意去吓旅行。王英偉就講起，啱啱去完西班牙同葡萄牙，參觀當地嘅酒莊同睇吓一啲特色建築物，佢話好鍾意歐洲，每年都會去，去旅行最鍾意就係睇風景同埋食當地嘅美食，仲話唔使自己做資料搜集o架，因為好多朋友都會同佢推介當地嘅米芝蓮餐廳。真係交遊廣闊嘞！
同場見到立法會議員馬逢國，問佢立法會提早休會，係咪可以多啲時間去玩囉？點知佢話一樣咁忙，因為個個都知佢提早休會，所以好多人邀請佢出席活動，依家個期已經排到八月尾啦，去到九月先再諗吓有冇得行開吓啦。
鄭泳舜趁暑假練渡海泳
至於另一名立法會議員鄭泳舜喺另一個場合現身時，睇落似乎黑咗，佢話，可能因為近來立法會開唔到會，所以多咗時間落區而黑咗，之前肥咗有啲肚腩，啲同事黐咗張肚腩相喺辦公室添，趁住暑假到，多少少時間做運動，中午就會去跑吓步，又會抽時間去練定渡海泳，料練到游二千米嘅話，游渡海泳時就應該夠氣完成，自己去年游得較慢，盼今年會快啲啦！
卓妮