笑看天下:口斥漢奸 更要嚴打

有道是「牆倒眾人推」,喺林鄭月娥宣布修例壽終正寢後,「搞事四人幫」就高調出嚟攪局。繼漢奸黎日前赴美,同美國國務卿蓬佩奧就修例等議題會面後,有「民主阿婆」之稱嘅前政務司司長陳方安生又耐不住寂寞,不在其位仍要「謀其政」,撲出嚟唯恐市民唔知佢係港英時代嘅舊電池,又在大氣電波話要眾籌一百萬元,就修例一事撰寫民情報告喎!

「民主阿婆」話報告將會探討修例爭議、市民對港府處理手法嘅意見同埋民間訴求,有關報告仲會提交各國駐港領事館添!主其事者為剛脫離港大而另起爐灶嘅香港民意研究所,研究所主席兼行政總裁鍾庭耀曾經話要眾籌六百萬元作經費,之但係幾個月下來,被指只籌得幾萬銀。家陣得「民主阿婆」搵佢做報告,直情係有了救命草!

老朽唔使水晶球在手,都估到份報告唔慌會提意見,教政府如何修補社會撕裂、怎樣聚焦香港經濟,肯定又係劍指特區政府施政無能、林鄭一意孤行不聽民意令青年絕望,諸如此類,總之目的就係要唱衰香港!不過,「唱衰香港」都要睇身份,「民主阿婆」家陣仲攞緊政府長俸,食君之祿不但未能擔君之憂,仲要扮有正能量,對特區政府的管治指指點點,又飛來撲去周圍唱衰香港、告洋狀,簡直不要臉及無恥!

漢奸黎做漢奸就吸睛惹火得多,內地官媒一再發表評論文章直斥其挾洋自重、勾結外國勢力,「將嚴重損害香港的繁榮」,並形容這是賣港行為!事實上,漢奸黎反中亂港永遠站在第一線,旗下爛果報煽動仇中反共,鼓舞年輕人衝擊政府,唯恐天下不亂,可是特區政府一味龜縮,恐洋懼外,司法更充當其保護傘,漢奸黎的反中亂港言行愈發無底線,早前更囂張到大字標題要「送王志民入赤柱」,狂妄成咁,同造反、政變有乜分別?中央若只是口斥而未能嚴打,刑不當罪,養狗咬心口,不祥之兆,莫此為甚!