政情:離開街工一年 黃潤達多咗白髮

曾經係街工成員多年嘅葵青區議員黃潤達,約一年前退出街工,佢尋日出席區議會時,白頭髮明顯多咗,佢都承認係,又話其實以前都多,而年紀愈大就愈多,仲話呢一年來並無特別忙,而係多咗空間思考唔同嘅嘢,例如多咗同唔同嘅政治團體合作,但佢暫時都冇政黨正式邀請過佢加入,自己亦暫無意加入政黨,覺得冇政黨身份仲靈活啲。

佢話以前係街工成員,未必能夠參與其他政黨嘅行動,依家同唔同政治團體合作都少咗包袱,多咗合作空間。佢又覺得呢一年來多啲時間關注地區事務,因為以前喺街工始終有啲時間要幫手會務,而依家自己仍有繼續做一啲幫殘疾人士爭取權益等勞工議題,同以往分別都唔大。

暫冇政黨招手

咁有冇政黨向佢招手?佢話冇,只係工黨啲朋友成日都講笑,試過出席工黨晚宴時,對方講笑話畀份報名表佢。

第一手消息請下載on.cc東網iPhone/iPad/Android/Windows Phone Apps