中環出更:民主阿婆要求問責 葉劉駁斥:失憶呀?

不論香港發生乜嘢事,「搞事四人幫」中嘅政壇舊電池就最鍾意出嚟噏三噏四,其中有「民主阿婆」之稱嘅前政務司司長陳方安生,前日話要撰寫民情報告唱衰香港,尋日再同自由黨榮譽主席田北俊嚟個隔空大合奏,繼續狙擊新民黨主席葉劉淑儀,要求佢辭去行政會議成員,為修訂《逃犯條例》搞出一系列社會矛盾負責!葉劉就反擊問民主阿婆係咪失憶?當初有份要求盡快傾修例(口架)喎。

話說民主阿婆尋日出席電台節目時,話認同田北俊嘅說法,點名葉劉同湯家驊要負責喎。唔單止咁,民主阿婆仲似作過來人咁「教」政府做嘢,叫特首林鄭月娥諗清楚,行會係橡皮圖章定諮詢機構,如果要諮詢就唔應該只有建制陣營代表喎。對於因腳痛落台嘅前特首董建華就將年輕人上街賴係通識教育失敗所致,民主阿婆反問董建華係咪了解通識科,強調呢科係培養學生獨立批判思考能力,引述坊間說法,如果無咗呢科,可能仲多人上街喎。

曾吩咐葉劉盡快傾移交逃犯

葉劉回應時就鬧民主阿婆「係咪失憶?」嘲諷佢做政務司司長時,吩咐做緊保安局局長嘅葉劉,要盡快同中央商討移交逃犯,明顯就係知道條例幾重要喇!民主阿婆成個「攝石人」見位就攝,過氣咁耐仲想教政府做嘢,定係想借啲意入行會又再禍害香港咋?

第一手消息請下載on.cc東網iPhone/iPad/Android/Windows Phone Apps