中環出更：平衡力差方黃吉雯唔敢玩單車賽
致力於治盲同防盲工作嘅慈善組織「健康快車」，計劃喺今年十二月喺元朗錦田繞道舉行慈善單車賽。今次賽事設有九個唔同組別，務求唔同水平同年齡層嘅單車愛好者都可以玩得盡興。創會主席方黃吉雯雖然都熱衷踩單車，但今次嘅單車賽事，佢就掛上免踩戰牌。
方太話自小就好怕跌，一直都無法掌握平衡技巧，以致除咗三個轆嘅單車，就惟有健身房內四平八穩嘅單車機，先至可以成為方太嘅座駕。不過，佢仲有一套踩單車機嘅心得，就係先盡力全速踩一分鐘，然後稍為放緩十幾秒，繼而又再拚足勁道踩一分鐘，如是者張弛有度咁交替踩幾次，唔使筋疲力竭，都收到帶氧運動嘅效果。
出席慈善單車賽記者會嘅體壇猛人，有奧運金牌名將李小鵬，同體操王子李寧。業餘單車手李家威擔任賽事委員，佢話香港好多人鍾意踩單車，但都經常為路狹車多而苦惱，尤其係業餘單車運動員，多數會嫌單車徑過於窄小之餘，內裏又太多慢駛嘅單車，對速度練習構成妨礙。然而一旦越過單車徑，就有惹來警方票控嘅顧慮，又有同其他車輛意外碰撞嘅風險。佢話同歐洲相比，香港公路單車練習所選擇嘅道路坡度較大，又要瞻前顧後提防唔友善嘅駕駛者，結果練就港產單車健兒一身好武功。
陳振興清雜草失愛驅
綽號「山地興」嘅前香港單車代表陳振興，就指香港單車健兒一旦進身為全職級別，就會以昆明為訓練基地。雖然昆明地勢較高，有利運動員鍛煉體能，但佢就試過喺訓練基地內，落車清理練習路線上嘅雜草時，誰知轉眼之間佢部座駕竟消失無蹤。儘管單車失竊令人不快，但佢認為係個別事件，唔會打擊佢對單車運動嘅熱誠。
卓妮