職場健康：返工易眼攰 多個方法紓緩

「咦？醫生我呢行成日對住電腦，請問我視力有冇變差呀？」阿強向醫生查詢。

「你好呀，經過檢查之後，你嘅視力好好呀！見你咁有興趣，等我講多啲你知啦！我哋喺日常生活中有可能不知不覺間損害到我哋嘅眼睛，例如使用度數唔啱嘅眼鏡、在車廂中閱讀、戴住隱形眼鏡瞓覺、沉迷電子遊戲，甚至開住燈瞓覺，都喺對隻眼唔好o架！」

20-20-20法則 加簡單運動

「而好似你嘅工作咁，需要長時間使用電腦，好容易出現眼睛疲勞等徵狀。因為當我哋睇遠嘅景物時，眼睛可以在放鬆嘅情況下將圖像聚焦在視網膜上。相反，要睇距離近嘅電腦屏幕，晶狀體就必須收緊先可以將光線聚焦。所以近年推廣嘅『20-20-20』法則，係有助紓緩眼睛疲勞嘅。個方法好簡單，就係每使用電腦20分鐘，就應該稍為小休20秒，並遠眺20呎外嘅景物。此外，顯示屏幕設備同桌椅嘅設計、工作環境照明等，都要注意o架！」醫生說。

「我哋公司有幫同事定期做顯示屏幕設備風險評估，我仲想請問有冇方法可以幫助紓緩眼睛疲勞o架？」

「當然有啦，例如在眼睛周圍沿住骨位下陷處輕輕按摩；用溫熱毛巾暖敷或用冷毛巾冷敷，都有助消除眼睛疲勞。而以下呢個簡單眼睛運動都可以幫到你！」

「嘩，係幾舒服喎！我一定要提醒同事一齊實行啦！」

職業安全健康局

www.oshc.org.hk