政情：聶德權Fb貼文破紀錄 查實係畀網民鬧爆
相信唔少人喺Facebook或者其他社交網站貼文後，都會希望多人睇多人留言，好似政制及內地事務局局長聶德權尋日就喺Fb話自己前日個貼文破咗紀錄，係開設以嚟最多人睇、留言同分享，睇落就自我感覺良好，但就畀網民鬧爆咁大件事都唔開記者會講，只係識喺網上發文。唔通近日社會氣氛緊張，搞到佢唔敢現身，變咗做鍵盤戰士？
事緣係內地近年正逐步實施「社會信用體系」，唔少市民擔心香港都會實施，從而被政府監控，搞到政府前日唔單止要發新聞稿澄清絕無此事，聶德權自己都有喺Fb發文解釋，造成佢所講歷來最旺場嘅貼文，不過旺場唔代表正場，事關網民都係鬧嘅居多，搞到聶德權尋日都話感受到市民對政府嘅不信任。
仲用緊慢到爆嘅IE
如果細心啲睇埋聶德權尋日貼文張相，會發現佢似乎係用緊出名慢到爆嘅瀏覽器Internet Explorer（IE），唔通佢身為政府高官都唔識用啲較快、較有效率嘅瀏覽器？難怪近年政府成日都好似跟唔到社會步伐咁，搞到被人鬧「離地」啦！