政情：民主阿婆 乞百萬告洋狀無恥唱衰香港

撰民情報告交各國駐港領事館

本身係公民實踐培育基金董事嘅民主阿婆尋日召開記者會，話會委託香港民意研究所就修例一事撰寫民間民情報告，報告將會係探討修例爭議、市民對港府處理手法同埋民間訴求，仲會發起網上眾籌一百萬元嚟做呢份報告添！

香港民意研究所主席兼行政總裁鍾庭耀話會分三階段進行，當中包括一般市民同只針對青年嘅民調，最後撰寫報告，預計份報告喺十月底發表，報告唔止會交畀各國駐港領事館，仲會要求各國外交部撰寫香港情況時，積極參考份報告喎。

其實民主阿婆同「搞事四人幫」另一成員、有「李漢奸」之稱嘅民主黨（白鴿黨）創黨主席李柱銘，過往多年來不停外訪唱衰香港，亦曾被英國官員冷待，而民主阿婆更早喺今年五月赴德國，李漢奸亦於同月去咗美加，多次行程都有提修例，二人其後曾被批評喺外國唱衰香港，令人作嘔。

喺政府已宣布修例壽終正寢後，各界都諗緊點樣可以修補社會撕裂，重回軌道，聚焦喺民生同經濟，但民主阿婆仲想借撰寫民情報告搞事，真係唯恐天下不亂。

再講，脫離港大民意研究計劃而另起爐灶嘅香港民意研究所，鍾庭耀曾經講過要眾籌六百萬元作經費，但係幾個月以嚟只籌到幾萬蚊，依家民主阿婆將撰寫民情報告交畀鍾庭耀，簡直係畀咗條活命草佢呀！

「搞事四人幫」與外國勢力扯貓尾

時事評論員陳雲生批評民主阿婆出任過政務司司長，應該比任何人更清楚香港嘅施政，而且民主阿婆仲攞緊政府長俸，反而去外國告洋狀，直斥做法係不要臉同無恥。陳雲生又形容「搞事四人幫」根本係聯同外國政府合奏緊國際大合唱，認為係同外國政府互扯貓尾唱衰香港。