中環出更：吳家榮克服截肢重投運動世界
出門遠行除咗體驗異地風光增廣見聞，仲可以喚起一個人嘅自信同鬥志。香港傷殘青年協會（傷青會）理事會主席吳家榮，童年時活潑好動熱衷多種體育運動，然而喺十四歲生日當天，確診患上骨癌，後來須進行截肢手術以保性命。儘管畢生都需以義肢為伴，但佢經歷一次旅程之後，好快就恢復自信，積極面對人生種種挑戰。
吳家榮、傷青會行政總監劉家倫同行政主任鄭欣欣尋日一齊出席活動。吳家榮憶起當日同癌魔搏鬥，更要切除患癌嘅左腿。喺瀕臨死亡邊緣嘅佢當時渴望遊覽某主題樂園，後來得到慈善組織願望成真基金嘅資助，令佢得以同家人一償心願。但喺出發前，佢好擔心能否應付長途嘅旅程，結果佢喺輪椅嘅輔助下，遊覽主題樂園嘅旅程頗為圓滿，佢亦從而自我肯定，認為縱使前景不明，但只要堅持信念，好多困難都可以克服。
患癌前嘅吳家榮熱衷長跑運動，截肢後雖然有幾年無法上體育堂，但後來佢考入大學醫科，認識幾位殘疾朋友之後又再重投體育運動嘅世界。擔任傷青會主席之後，得悉童年時代就非常嚮往嘅主題樂園，將喺今年十一月舉辦長跑活動，且將部分收益撥捐畀傷青會，以支持「傷青動力學堂」嘅發展。佢話到時會坐輪椅落場跑埋一份，同安排仔女到場為健兒打氣。
吳崇維：傷殘人士需持續運動
傷青動力學堂嘅歷奇訓練主任吳崇維指，行動不便嘅傷殘人士係亟需持續嘅體育運動，以促進肌肉同心肺功能，有助鍛煉意志激發自信。佢話坐輪椅嘅傷殘人士要進行長跑活動，較健全人士更講求腹背嘅肌肉運用，而繩網同攀山等歷奇活動，都有助强化傷殘人士嘅體魄。
主題樂園嘅企業公民事務總監黎珮珊期望健全同殘障人士都可享受好玩有趣嘅長跑活動，而佢雖然唔係運動健將，未必有能力一口氣跑完十公里，但屆時都會盡力跑得幾遠就有幾遠。
卓妮