政情：今日你上鏡：入商場仆親 許晉平傷膝「毀容」

尋日喺中環見到「九巴金公主」伍穎梅嘅男朋友許晉平（圖），望真啲見到佢左顴骨位有塊大膠布貼住。好傷咁喎，於是上前問佢做乜搞成咁？佢話喺上星期入商場時，地下防滑地氈接駁口膠紙甩咗出嚟，所以佢戟親成個人趴咗落地，跌到眼鏡都爛埋，左顴骨位同膝頭擦損流血，為安全起見叫白車送院檢查。佢話好彩只係擦傷面部唔使縫針，休息咗一段短時間之後繼續返工，冇影響工作，但依家行路要慢慢嚟，唔可以快，因為膝頭仲有啲痛，佢仲講笑咁話今次真係仆×嘞。咁女朋友知道咪好心痛囉？佢就冇答，但面上就流露着甜絲絲嘅微笑。