中環出更：葉劉發炮叫脫離建制田北辰轟不知所謂

反對修訂《逃犯條例》鬧到滿城風雨，連帶建制派之間都爆內訌，可謂黑鑊滿天飛，等緊邊個肯孭飛。實政圓桌田北辰，同前黨友、新民黨葉劉淑儀近日隔空爆罵戰，首先前日早上田北辰就不點名話行政會議成員唔應該有政黨背景，身兼行會成員嘅葉劉下晝就發炮叫田唔滿意就脫離建制派。田北辰尋日再開腔怒轟葉劉「不知所謂！」

將局勢問題同行會成員拉上關係，就由田北辰長兄、自由黨榮譽主席田北俊公開批評，話行會成員撐修例搞出大頭佛，要求葉劉辭職開始。田北辰早前不點名話政黨人唔應該入行會，靠雙料議員箍票就永無寧日，葉劉就反駁話建制派應該支持政府，係「執政聯盟」，如果有人認為唔應該可以考慮脫離建制派。

田北辰尋日喺電台話，作為議員就係為咗監察中央同香港政府反映意見，唔係配合政府，直指所謂「執政聯盟」只係用咗好聽嘅字眼，實情就係幫政府拉票，所以行會成員更唔應該由政黨人出任，唔可以對政府過於唯命是從。

睇嚟大家可以準備花生睇好戲嘞，係唔係執政聯盟唔係幾個人嘈嚟嘈去可以定性，繼續內訌只係丟架人前，不如幫手處理當前局勢好過喇！

卓妮

中環出更：葉劉發炮叫脫離建制 田北辰轟不知所謂