中環出更：屋邨歲月唔覺窮 范建強：冇比較冇抱怨
每個年代都有佢嘅特色同背景，為幫助年輕人了解上一代或兩代嘅生活，香港青年旅舍協會今年就以「兩代情」為題搞咗個徵文比賽，叫學生訪問上一代長輩，了解佢哋嘅昔日屋邨歲月，再寫成故事。
活動評審之一、香港中文大學工商管理學院前副院長范建強喺尋日嘅頒獎典禮上講起，自己細細個時屋企好窮，窮到每逢月底都要問隔籬鄰舍借錢，但佢話當時雖然窮，但因為大家都係基層出身，連升唔升到學都唔會點諗，所以冇比較亦冇抱怨咁話！
練琴聲傳鄰里 黎穎瑜呻尷尬
佢仲話細個時唔知道屋企係窮，但父母就每個月月底都叫佢去問隔籬左右借錢，而月頭還錢就由父母親自去還，唔知係咪因為父母成日借怕尷尬，所以叫個細路仔去借？但佢話好彩，事關以前借錢時啲隔籬鄰舍都冇托手（月爭），可見大家感情好好，依家就算大咗，上一代有啲過咗身或移咗民，但下一代依然會久唔久敍吓舊。
民政事務局局長政治助理黎穎瑜就話爺爺嫲嫲住公屋，細個時都有喺佢哋住處練揚琴，查實佢就唔係好鍾意，事關一練琴隔籬左右都聽到晒，如果係咁彈錯就好尷尬咁，但亦因為咁逼到佢彈好啲，唔彈錯就冇事囉！佢仲話最初想學敲擊樂，但敲擊樂比揚琴嘈得多，住公屋的話睇怕都練唔到喇！
香港青年旅舍協會主席廖仲賢都係喺公屋長大，最惡劣時試過幾百人共用三、四格廁所，所以難免會有啲人冇公德心，會有爭拗，不過佢話整體上都係好感情嘅居多，大個見番都冇話見到仇人咁。佢仲話細個時有一個精神病患者住喺佢樓下，成日同細路仔玩，搞到佢父母都好擔心，但佢就話唔驚喇，事關咁多年都冇見過嗰名住戶病發，父母驚係出於佢哋唔了解精神病啫！
卓妮