政情：八網難逃：梁敬國游水感觸 望池嘆「干卿底事」
呢排天氣驟晴驟雨，有時涼有時熱，好易感冒，但商務及經濟發展局前副局長梁敬國就唔理得咁多嘞，日前已舉行「下水禮」，去泳池操水呀！
鍛煉甩轆 撳錯錶掣
佢喺Facebook貼文話久違咗嘅泳池，終於可以正正式式完成第一課鍛煉，點知撳錯掣，游完三十個塘唔知用咗幾多時間？」平時佢會計時睇吓游得快定慢，點解咁甩轆呀？跟住佢話「回頭再望個泳池，心中不禁湧出「吹皺一池春水，干卿底事」之嘆，又話「真個干卿底事？亦想起『居廟堂之高則憂其民，處江湖之遠則憂其君；是進亦憂，退亦憂』」。
點解突然間引用《岳陽樓記》？睇嚟有啲沉溺憂思喎。可能係對近期發生嘅事有感而發，事關集會發生肢體衝突，社會咁撕裂，喺「熱廚房」嗰班官固然難做，就算係冇做官嘅佢都難抽離，亦對社會紛爭感到憂慮。