中環出更：黃錦星做大嘥鬼 加水站斟瀉水
由環境保護署設計嘅「大嘥鬼」呢兩年可謂深入民心，唔少推廣環保嘅活動都見到佢嘅蹤影。日前大嘥鬼就去到西貢，仲喺嗰度嘅加水站斟水，不過就斟到滿瀉，真係嘥晒啲水喇！不過，呢位大嘥鬼就唔係其他人，正正係環境局局長黃錦星，真係抵打。
黃錦星前日去咗西貢一帶，話見到水浪窩同北潭涌等已有業界設置嘅「加水機」，要加幾多水、想要凍水定熱水都有得揀。而喺北潭涌、蕉坑同清水灣大（土幻）門亦都有漁農自然護理署郊野公園嘅免費「加水站」，佢就呼籲市民多啲撐「添水不添膠」行動，自己帶水壺斟水，減少即棄膠樽水。不過，見佢上載嘅照片，就發現佢斟到啲水滿瀉，珍惜食水方面，真係要扣佢分至得。
網民促加水站 設GPS
唔少網民見到黃錦星喺社交網站嘅貼文都紛紛留言，有人就關注當局點樣去確保水機嘅衞生情況同水質，亦有人建議可以有GPS（定位系統）顯示加水站位置。如果當局唔接納呢啲建議，加水站隨時冇人敢用，甚至市民搵唔到，咁就真係嘥氣喇！
卓妮