中環出更：跟外籍師傅學功夫 施家殷呻好艱苦
要練一身好武功，有名師教導當然好，但徒弟嘅資質亦都好重要。香港國術總會（總會）名譽會長施家殷以前喺外國求學期間，曾拜自由搏擊高手為師，希望練到一副不凡嘅武術身手，然而訓練過程實在艱苦，最終都要掛起拳套放棄習武生涯。
卓妮尋日喺全港學界武術比賽仲見到總會副會長周國豐同秘書長歐陽鳳盈。施家殷更憶述，以前喺澳洲「食夜粥」，初時係喺移居當地港人所開設嘅拳館學武，雖然同聲同氣，但練功較側重喺提升體能同強化肌肉，格鬥技巧嘅傳授相對較少，加上大人細路廿幾三十人一齊柴娃娃集體操練，好難做到「因材施教」。
後來佢另投師門，得到一位外籍自由搏擊高手收為徒弟，進行一對一嘅個別傳授。佢學咗武術招式，師傅又要佢喺器具協助下撐開雙腳苦練一字馬，務求喺擂台上可以起腳踢中對方頭部。雖然精英武術訓練令佢吃盡苦頭，但都未能喺擂台上奪得榮耀。但至今佢仍然認為一對一或小班傳授較大班教學更勝一籌。
總會嘅創會會長王嘉恩童年時接觸嘅武術係空手道同柔道，但後來發覺日系武術嘅源頭其實嚟自中國，於是就轉移軌道，潛心喺中國武術嘅世界。佢話論招式變化，日系武術唔及得中國武術，但中國武術就唔似得日系武術，創立色帶制度以認證其武功段級，但依家開始有武術機構會向學習中國武術嘅小朋友頒發證書，從而有助進入心儀學校，呢種做法雖然係有啲功利，但對於中國武術普及化，確係有一定嘅幫助。
黃偉鴻睇片學太極
品牌發展局副主席黃偉鴻多年嚟鍛煉楊式太極拳，近來又涉獵陳式太極。到底係去邊度拜師學藝呢？答案原來係錄影片段。佢話睇錄影學太極已經有廿年，姿態正確對習武而言非常重要，所以佢寧願放慢學習進度，都要盡量避免姿勢錯誤喎。
卓妮