政情：施榮忻傳承足球樂 幫囝囝改埋球星名
唔少足球迷都會以球星名字為仔女命名，好似香港菁英會創會兼榮譽主席施榮忻，就用前西班牙國腳費蘭度托利斯（費托）為囝囝命名Torres，而且囝囝更人如其名鍾意踢波添。
施榮忻話，兩父子都有一齊睇波，不過深夜球賽就無喇，而去外國特登睇球賽都未試過，因為擔心現場氣氛太高漲，或會有突發事件出現，帶住小朋友唔方便囉。
囝囝夢想係「上車」
另外，施榮忻就話，為囝囝改名Torres係因當年費托好紅，而自己亦鍾意呢個讀音，至於費托上月宣布退役，囝囝會唔會有留意，甚至有啲唔開心呢？佢就話囝囝仲未沉迷足球到呢個地步，而自己都無留意。佢又話，雖然九歲嘅囝囝鍾意足球，但就無以足球員作為夢想，反而搞笑地話夢想係「上車」，因為知道物業保值喎，估計囝囝係睇新聞學識呢啲喇。