政情：痛失傾訴對象 徐子見變貓奴
寵物係唔少人最好嘅朋友，就好似東區區議員徐子見（Andy）曾經接收街坊棄養嘅倉鼠「細細」，放咗喺辦公室飼養，每當佢思緒混亂時，就會將佢放上手，細細聲同佢傾偈，無論係遇到乜嘢辛酸事，又或者有咩鴻圖大計，都會同「細細」分享，不過「細細」早幾個月已因病離世，從此Andy就少咗個傾訴對象。
最近領養咗「棉花糖」
不過，大家唔使擔心，Andy近來又搵到個知心友喇！話說早排喺九龍區一個街市，有檔主養咗隻貓，不過就冇幫佢絕育，結果就搞到兒孫滿堂，檔主冇辦法照顧咁多隻貓，所以打算棄養，Andy知道之後就即刻接收咗其中一隻叫「棉花糖」嘅貓仔。佢話「棉花糖」起初非常怕人，成日匿埋，經過幾個月嘅相處，依家對人嘅戒心降低咗，而且咁耐以嚟，只係打爛過一隻杯啫。聽落都幾乖嘅！
Andy又話，雖然依家人多嘅時候，「棉花糖」都會匿埋，不過到冇人時，就會主動出嚟同Andy玩，Andy夜晚仲會同「棉花糖」傾偈添，「棉花糖」已經變成主子。睇嚟地球又多一個貓奴啦！