中環出更：吳文遠禍不單行 在囚期間撞親頭
社民連主席吳文遠喺二○一六年時被指透過新聞媒體同社交網站等，向公眾披露時任民政事務局常任秘書長馮程淑儀係廉政公署受調查人等資料，涉違反《防止賄賂條例》，舊年被裁定三項披露受調查人身份等資料罪罪成，佢有提出上訴但上個月被高等法院駁回，即時入獄，點知坐咗一個月都未夠，就託人喺社交網站講自己喺獄中工作時撞親個頭，仲一度送院治理！
查實吳文遠都可謂禍不單行，事關佢上個月入獄第二日，就已經話自己有啲感冒，依家又撞親頭入院，都算相當「黑仔」，不過吳都有提到依家已無大礙，嚟緊仲有望喺本月十五日申請保釋外出，話希望到時同大家「街頭見」，見佢講到明準備再上街，相信佢病情唔算嚴重嘞。
睇番吳文遠上次貼文仲提到喺獄中撞到香港眾志秘書長黃之鋒，不過黃依家已經出咗獄，吳仍在獄中，雖然吳都申請緊保釋番出嚟，但其實今時今日咁嘅社會環境，未來會發生咩事都實在難以估計，而距離吳申請保釋嘅日子仲有成九日，咁快就講定「街頭見」，唔知會唔會早咗啲呢？
卓妮