中環出更：美白秘方 胡珠孖太太學氣功
運動係保持身體健康嘅好方法，當中唔少人都鍾意玩武術，團體「健康快車」尋日搞咗個「武林群英匯光明」，廣邀唔同嘅武術團體比賽切磋，交流吓心得，其中活動籌委會主席胡珠話，自己冇運動多年，不過，太太黃愛平早排搵咗氣功師傅教佢，師傅第一次見到胡珠時，覺得佢皮膚黝黑，一度誤以為佢有病添，胡珠其後就開始跟佢學氣功調理身體嘞。胡珠當然冇病，不過考慮到健康，就同埋太太一齊學，點知學咗兩個月，皮膚又真係白咗喎！唔通呢種係隱世美白方法？
胡珠話，其實佢細細個時都學過耍太極，不過去到十幾歲時就去咗做廚，此後忙於工作，就幾十年冇運動喇，直到太太早排覺得佢年紀大，持續冇運動都唔係辦法，而咁啱認識到氣功師傅周麟，所以就跟咗佢去學，主要都係學呼吸吐納，調理身體。周麟解釋佢呢套叫「華山氣功」，包含過百式，以前曾經叫「富豪氣功」，因為係有錢佬先至會學，不過依家多咗平民學喇。
陳明耀每朝游半句鐘水
講到氣功或者武術，健康快車香港基金副主席陳明耀就話自己完全唔識，不過佢都有恒常做運動，每朝早都會落去泳池游半個鐘水，不過就好少計自己游咗幾多、游得幾快，總之就係堅持每日游半個鐘，旨在保持身體健康。陳仲話自己細細個已經學識游水，唔使跟教練，同啲朋友一齊去玩就自己學識，不過佢就好少去海灘游水，事關佢覺得香港海灘好污糟，所以都係游泳池算喇。
健康快車創會主席方黃吉雯就比較鍾意做柔軟體操，話自己每日都會拉筋，只要有時間有地方就拉，講完仲即場示範添！見佢輕輕鬆鬆彎腰就可以雙手掂地，睇落的確日子有功。方黃吉雯仲話自己隨身帶住一個計步器，計住自己每日都要行一萬步，難怪佢年紀唔輕，睇落都可以健步如飛啦！
卓妮