中環出更：暑假康體亂象多 李美嫦仲出走一個月
即將踏入七月，開始放暑假，唔少人都會放大假去旅行，不過就唔係個個都適合放喇！好似康樂及文化事務署署長李美嫦就由尋日開始，放假到下月二十九日，足足一個月咁耐，聽落都幾寫意，不過暑假係搞康樂活動嘅高峰期，康文署理應好多事務要跟進，李美嫦喺呢個時間放大假，仲要放成個月，點睇都唔適合喎！
打波捱貴場 泳灘隨時關
其中一個康文署好需要喺暑假處理嘅題目就係炒場，一來學生放假會用多咗康文署設施，二來唔同團體搞活動時都會租用康文署場地，如果康文署依然好似平時咁，對炒場翹埋雙手唔理，受苦嘅始終就係市民，都唔知李美嫦係冇心處理定係有心避難，睇怕今個暑假都依然有唔少市民要捱貴場喇！
另一個例子就係泳池同泳灘，事關夏日炎炎，唔少人都會選擇去游水消暑，不過康文署轄下嘅泳池同泳灘不時都出現救生員唔夠嘅問題，甚至有時會因而關閉，查實唔少市民都係暑假先會去游水，如果冇得游都真係相當掃興，加上暑假係打風季節，可能好多時設施都需要作出臨時安排，依家李美嫦放成個月大假，到時出大事，唔知係咪肯銷假返工呢？
卓妮