政情：埃塞俄比亞尋商機 林曉盈畀空難嚇窒
內地嘅生產成本愈嚟愈高，廠商不斷到外地發掘另一條生產線。好似有「手套女王」之稱嘅香港手套業商會會長林曉盈，近年多次遠赴埃塞俄比亞尋找投資設廠嘅機會。雖然當地係有唔錯嘅發展勢頭，但三個月前嘅埃航空難，距離林曉盈離開該國返抵香港僅三天，震驚之餘，到當地設廠嘅計劃亦要重新評估。
設廠大計暫畫休止符
林曉盈話埃塞俄比亞嘅設廠大計之所以暫時畫上休止符，主要原因係當地製造業配套仲未完善。佢話當地儘管勞動力充裕，工資低廉，以及該國享有零關稅待遇等等有利條件，然而礙於該國工業發展起步較遲，供應鏈尚在形成階段，以致部分材料或配件都要由外國輸入，導致生產流程未能一氣呵成，對準時交貨可能構成阻滯。衡量得失之後，還是觀察一段日子再作打算。
雖然往埃塞俄比亞嘅發展計劃暫時放下，但佢難忘當地民風友善，不時聽到當地人以普通話講「你好」。佢又注意到當地盛產青菜，對於素食人士而言實屬喜訊。