政情：林琳手術成功 做直播唔笑得
荃灣區議員林琳近日入院做婦科手術，原來佢係患有俗稱「朱古力瘤」嘅子宮內膜異位，而尋日佢終於出院喇，仲喺社交網站直播時話手術好成功，不過身體仲係好虛，冇乜中氣，要返屋企休息三星期，而佢都會盡量覆訊息，但嗌交嗰啲就唔覆喇，因為呢段時間要好冷靜喎。
出院返屋企休養
林琳喺醫院做直播時話自己唔可以笑，因為一笑就會好痛。佢又話，呢個手術話大唔大，話細唔細，比預期時間做得耐咗，依家傷口有三個窿，雖然頭腦清醒，但手術後仲覺得暈同會標冷汗，唔係好做到嘢，佢抖足精神之後，就會試吓出來行吓，因為醫生話長期攤喺度都唔係咁好，叫佢要盡量行幾步抖一抖喎。而佢辦理完出院手續就會返屋企，沖個涼舒服啲咁話。
林琳又話，依家要慢慢休養，近期都唔出得街，不過會盡量回覆訊息，只係依家食完藥會眼瞓同暈，希望大家如果見到有人搵佢，佢又冇應，就幫手覆一覆，而佢嘅助理都會繼續工作嘅。希望林琳早日康復喇。