政情：遺失體外除顫器 鄭松泰「心都跳出嚟」

鄭松泰話部機價值兩、三萬元，係舊一代嘅除顫器，但求助人平時用慣隨身出勤，希望可以搵得番部「老拍檔」。據佢了解，部機早前借出畀泛民議員，之後有議助大頭蝦，將部機轉折交去中信大廈附近嘅急救站，殊不知喺上周三當日，警方清場行動引起混亂，事後一片狼藉，搵唔番部機。

正聯絡好心人交收

不過，佢話最新嘅情況係已經聯絡到當日喺救護站幫手嘅義工，話有好心人喺混亂間執起咗，正聯絡相關人士交收，希望真係可以搵得番喇，因為已經好難訂到同一型號嘅機，兼且呢部係全金鐘義務救護站唯一一部除顫器，擔心嚟緊有大型示威行動需要時冇得用。