政情：放縱泛民搶先攞分 梁君彥惹建制怒憤
政府早前「跪低」暫緩修訂《逃犯條例》後，立法會喺前日順利召開大會，但最終流會收場，事關當日建制派不滿民主派「有風使盡（巾里）」，喺緊急質詢嘅環節不斷狙擊政府，最後仲點算法定人數，結果建制派為咗唔想招呼民主派，就決定唔入會議廳，刻意流會。不過，原來背後唔止係對民主派不滿咁簡單，有建制派話決定流會嘅另一個原因係對主席梁君彥表示不滿，事關梁君彥當日主持緊急質詢時太鬆手，令會議陷入「無人駕駛狀態」，面對非事實言論又冇糾正，搞到政府長期捱打。
建制刻意流會「抗議」
當日梁君彥一共批准咗二項緊急質詢同一項休會辯論，內容都係同本月十二日反修例人士衝擊立法會有關，按程序嘅話，會先處理緊急質詢，之後係普通口頭質詢，之後先到休會待續嘅議案。緊急質詢用咗超過四小時討論，有建制派中人透露，建制派原本並無打算喺緊急質詢嘅環節發言，諗住留番喺休會待續階段先講，點知見到梁君彥實在太過縱容民主派，形成「民主派霸權」，會議陷入「無人駕駛狀態」，所以到咗下午就決定流會，搞到唔少建制派急急腳改稿爭取發言，事關會議已傾唔到休會辯論議案，變相就係唔講冇機會講喇！
其實對梁君彥嘅不滿並唔止係佢主持會議嘅手法，仲有關於《國歌法條例草案》押後恢復二讀一事，事緣喺當日下午梁君彥曾公開話，議會目前需要修復同平靜落嚟，所以就建議政府將政治事件放埋一邊，唔好喺今個立法年度內恢復二讀，政府之後都有去信立法會表明唔會恢復二讀，表面睇落就係梁君彥「成功爭取」，結果就引起部分建制派不滿，大鬧佢嘅解釋同政府嘅解釋唔同，批評佢係爭住攞彩。
據了解，今次押後《國歌法條例草案》恢復二讀係政府主動要求，而立法會文件就寫明係因為喺七月十日恢復二讀嘅話會唔夠時間審議，所以就決定唔恢復二讀，同梁君彥嘅說法都有出入。建制派有聲音就認為喺修訂《逃犯條例》一役，建制派已輸咗唔少分，批評梁君彥竟然藉此急住搶分，為自己挽回公眾嘅形象。
有消息指建制派嘅WhatsApp群組已通知大家會流會，但有啲建制派議員可能未睇WhatsApp，或者怕失分而冇離開會議廳。由此可見，今次修例對建制派嘅打擊好大，大家都搵機會補飛。