政情：組織印傭童軍 吳亞明：促進社會融合

吳亞明話全球五千萬嘅童軍當中，印尼佔咗一千八百萬，可見唔少印尼人過去都有做童軍嘅經驗，相信來港後再度投身童軍隊伍應會容易適應。儘管童軍係以少年居多，但年屆十八至二十六歲嘅成年人可加入樂行童軍，而超過二十六歲就可考慮擔任教練；但礙於懂印尼話嘅童軍領袖唔多，因此印傭樂行童軍嘅規模有限。

文化風俗唔同 搞活動要諗多步

其實加入童軍嘅少數族裔亦日漸增多，吳亞明話由於文化風俗唔同，組織活動時要多一分考慮，譬如童軍露營，少數族裔嘅長老就未必容許女性參與，而制服亦要戴頭巾同着長褲以符合文化傳統。佢又話童軍總會將開展名為「為社區作貢獻」嘅計劃，安排童軍探訪長者、教授新移民婦女家居安全、非華語青少年進行美食交流及維修社區設施等一系列活動，以服務各個弱勢群體。