政情：立會點人數 陳沛然被困後樓梯
立法會大會尋日喺會議法定人數不足下流會，而喺流會之前，醫學界議員陳沛然（Pierre）竟然被困喺立法會大樓內嘅後樓梯！究竟發生乜嘢事呢？
拍完卡開唔到門
Pierre尋日下午喺社交網站發貼文，話立法會大會有議員要求點算會議法定人數，佢就跑樓梯落去位於立法會大樓一樓嘅會議廳，但點知就喺一樓後樓梯門口被困，因為佢用議員工作證拍卡之後，後樓梯出口嘅大門未能打開，直言係「望門興嘆流會」。Pierre未能趕及喺流會之前入會議廳，佢就此表示抱歉，佢亦都喺事後向立法會秘書處嘅工作人員了解發生乜嘢事。
立法會秘書處回覆話，已向Pierre了解事件，亦同Pierre嘅議員助理一齊到Pierre所提及嘅後樓梯，測試Pierre嘅通行證，證實拍卡功能正常。不過為穩妥起見，Pierre亦都同意秘書處嘅建議，即日已換咗新嘅通行證喇！