政情：泛民開會借題發揮 何君堯明寸係契弟
政府修訂《逃犯條例》觸發爭議，日前反對修例嘅示威者更因衝擊立法會同警方發生激烈衝突，而立法會內，泛民同建制派之間亦氣氛緊張，兩邊陣營嘅戰線亦由立法會大會蔓延到各個委員會會議，尋日就伸延到負責審議政府工程嘅立法會工務小組委員會。獨立建制派立法會議員何君堯會上大鬧泛民「冇醫德」、甚至仲「契弟」前「契弟」後，班泛民聽到即刻發火，其中本身係醫生嘅議員郭家麒反斥︰「何君堯你係垃圾嚟！」冤冤相報真係唔知幾時了喇。
尋日工務小組原本係審議喺將軍澳——藍田隧道設立不停車繳費系統，但會上有議員要求在場嘅運輸及房屋局副局長蘇偉文就近日警方嘅表現表態，仲叫蘇辭職添，而蘇當時就回應咗句︰「冇補充」。但啲泛民就唔滿意，郭家麒仲質疑蘇作為學者點可以冇自己意見，直言︰「我對你（蘇偉文）好失望。」
郭家麒反斥何係垃圾
何君堯發言時就批評泛民喺會上借題發揮，認為關於修例嘅嘢應該喺立法會大會討論，仲話︰「尤其係嗰啲冇醫德嗰啲呢、CIA（美國中央情報局）契弟嗰啲呢，我好鬼憎。」雖然何冇點名批評，但郭家麒就即刻反駁︰「哩個係立法會嚟o架，契弟前契弟後呢啲咁不堪入耳嘅嘢，我請何君堯收回。」又話何「堂堂係個律師，講啲咁肉酸嘅說話」，仲反問︰「邊啲係CIA契弟？」
工務小組委員會主席盧偉國一度嘗試停止呢場罵戰，話何君堯冇針對任何人，不過盧呢句似乎變咗火上加油，郭家麒隨即問︰「契弟呢個字可以用？」何就回應︰「係呀，因為你係！」郭家麒即刻反擊，大鬧何君堯係「垃圾」。
鄺俊宇要求收回言論
本來只係何君堯、郭家麒二人嘅罵戰，但泛民陣營議員鄺俊宇（Roy）就加入戰團，要求何收回言論，點知就燒埋自己嗰疊。何話︰「我冇任何含意、或者係明示郭家麒係契弟，我冇咁講，我亦都冇咁講鄺俊宇都係契弟。」Roy聽完就再次要求何澄清「鄺俊宇係契弟」呢個言論，何就回應︰「連中文你都唔識聽呀﹖我冇話到鄺俊宇議員係契弟。」
吵吵鬧鬧一輪，盧偉國就要求何君堯就原本嘅議程提出問題，罵戰終於平息。盧過去多次成為罵戰主角，喺會上同議員嘈交，今次到佢食住花生睇戲，唔知係咪別有一番滋味呢。