中環出更：劉燊濤再添丁三個就夠晒數
本已育有兩個囝囝嘅香港表廠商會副會長劉燊濤（Gary）前日又添丁，BB重六磅八安士。知道佢本來想追個女，咁仲追唔追呢？佢就話，三個已經夠晒，收工喇，唔好再辛苦太太喎。
Gary話，二仔喺母親節出世，本來預期三仔會喺父親節出世，點知遲咗兩日，但都冇所謂，最重要係母子平安。佢又話，由於太太臨近生B，唔敢走咁遠，父親節當日都係喺屋企附近食飯慶祝。而今次太太生B好順利，太太被推咗入產房之後，佢就打電話通知家人，點知好快就聽到醫生話太太生咗喇。咁BB改咗名未？佢就話未，遲啲會搵師傅改。對於細仔嘅期望，佢就話最重要係健康成長，日後囝囝想做乜嘢，就等佢自由發展，唔想畀咁多規限囝囝。
眾所周知，Gary係利物浦粉絲，早前卓妮都問過佢去唔去睇英超，佢就話唔去，事關太太就嚟生BB，佢要陪伴在側。所以話呢，太太大過天，乜都放一邊。
陸頌雄希望囝囝健康快樂
發展局局長政治助理馮英倫早前添丁，啱啱就過咗首個父親節，見佢日前喺社交網站上載咗一家三口嘅合照，抱實囝囝以仁嘅佢，同太太笑容一致，仲買咗蛋糕慶祝添。有網友睇到張相，仲話好想搣吓BB。
立法會勞工界議員陸頌雄亦拍短片賀父親節。佢囝囝喺成段片中變咗「影後」，皆因囝囝全程都冇望鏡頭，只係見陸幫囝囝扣鈕同一齊玩，最後先見到一張佢抱住仲係BB時嘅囝囝嘅相。佢喺短片度都講得幾感性，話囝囝第一次行、第一次叫「爸爸」時嗰種喜樂係無與倫比，仲話好似係尋日發生咁，依家見囝囝跑得快過佢，有自己嘅主見同夢想，作為爸爸嘅佢最大嘅願望就係希望囝囝健康快樂，呢個就係最好嘅禮物喎。
卓妮