政情：悄悄撤回巴西肉廠名單 食安冷待業界講句都懶

話說前年巴西腐肉風暴爆發時，本港食物安全中心（食安中心）揭發巴西冷藏雞腳偽造衞生證明書個案，食安中心曾向業界諮詢，打算將可向香港進口凍肉嘅巴西肉廠數目限制喺八十間，其時聲稱已經佔大部分進口量。

不過，業界當時就已經有極大反響，其時指香港業界目前向逾四百間廠攞貨，批評加入新限制會減少入平貨嘅途徑，如果巴西肉廠合謀加價，香港業界就會「肉隨砧板上」，警告隨時搞到豬扒同雞翼等凍肉大幅加價。

據知，食安中心雖然以呢份八十間巴西肉廠嘅名單諮詢業界，但名單只係討論基礎同起步點，收到業界意見後，依家相關名單對後續工作意義不大，本港當局會同巴西當局商討可出口到本港廠房嘅名單同數目，以廠房嘅食物安全條件作首要考慮，過程會諮詢業界，做好平衡咁話。

邵家輝鬧爆食安添混亂

邵家輝就話，自己當時帶過業界去傾呢個問題，過咗咁耐，到底有咩進展仲係一舊雲咁，若果已經冇八十間廠呢個數，當局應該盡快交代，而且一開始亦唔應該即刻限死得八十間供應，咁急只會自亂陣腳，日後都應考慮唔好立亂公布有幾多間獲准供應嘅數字，否則數字一有更改，就會好混亂。

樣樣肉都貴 就快冇得食

邵家輝又話，唔止巴西凍肉，當局搞非洲豬瘟都搞得好差，零售業界想罷市，內地啲農場嬲香港搞得咁麻煩，唔多想供應畀香港，本港供應唔穩定，價格自然高，啲雞隻供應情況又類似係咁，樣樣肉類都貴，就快乜都冇得食，當局應該喺食物安全同營商環境之間做好啲喎！

講真嗰句，應唔應該限制供應廠嘅數目，真係好難講對與錯，如果冇限制，啲肉爆出食安問題，到時都好大鑊。不過，陳肇始真係應該要同業界溝通多啲，有諮詢結果就唔應該收收埋埋啦！