中環出更：臨門一腳受阻 國歌法上大會延期
立法會近來因為《逃犯條例》修例一事爭論不休，反對修例嘅民主派，上周五喺立法會內務委員會同財務委員會玩嘢同搗亂，令兩個會議都腰斬，唔止財會因此無法處理積壓嘅議程，就連內會都受牽連，包括《國歌條例草案》在內嘅法案委員會報告亦未能處理，令原定下周三恢復二讀嘅《國歌條例草案》需押後，相信《國歌條例草案》委員會主席廖長江都一額汗喇。
原定上星期五處理法委會報告
《國歌條例草案》原定於下周三恢復二讀，內會原於上周五處理有關法案委員會報告，以便條例草案下周三於大會審議。點知上周五內會腰斬，就無法處理有關報告，據了解，《國歌條例草案》亦因此無法喺原定嘅下周三審議。
內會日前接到政府三封來函，分別就《國歌條例草案》、《二○一九年司法人員（延展退休年齡）（修訂）條例草案》及《二○一九年選舉法例（雜項修訂）條例草案》恢復二讀辯論作磋商，立法會秘書就此諮詢議員，是否不反對喺下月三日就三條條例草案恢復二讀辯論，有關諮詢於今日中午十二時截止。
《國歌條例草案》委員會審議《國歌法》都尚算順利，喺密密加會下都算係快完成審議，相信廖長江對臨門一腳先遇上阻滯都好無奈喇。
卓妮