中環出更：明哥嚴選食米 為長者健康把關
港人一向嘴刁之餘，對健康飲食亦好講究。有「深水埗明哥」之稱嘅陳灼明，一直為弱勢社群提供飯餐，明哥話，少鹽、少油同食糙米，的確係健康飲食，但礙於老友記嘅味覺同腸胃機能退化，太過清淡嘅飲食，老友記可能難以下嚥，糙米亦可能不利退化嘅腸胃機能，所以嫌餸菜味淡仲可以用雞粉吊味，至於食米方面，就要嚴選嘞。
明哥尋日出席一間社企舉行嘅城市定向挑戰賽頒獎禮，佢講起，自己從事飲食業多年，試過內地、老撾、越南同澳洲嘅食米，發覺始終都係泰國米最適合港人口味，佢揀嘅泰國米價錢並非最貴，但勝在軟硬適中，香味又夠，售價最高嘅泰國米反而略嫌過軟，唔適合佢整盅頭飯畀老友記咁話。
黃子萌打算捐豆奶麥片
既然注重食米嘅品質，明哥對外界捐贈嘅食米又有無嚴格要求呢？佢話好難指定善長嘅捐贈，若果收到其他產地嘅食米，就會攙雜些少喺佢選用嘅泰國米之內，務求唔會浪費外界嘅捐贈。
舉辦今次城市定向挑戰賽嘅社企創辦人黃子萌，係曲棍球香港代表隊嘅前隊員，佢都好明白食物營養嘅重要，佢話食物銀行傾向向弱勢社群派罐頭，不過罐頭冇乜營養，更加唔係健康飲食，所以今次活動就打算捐豆奶或麥片等比較健康嘅食品。
至於有「恆隊長」之稱嘅香港單車代表隊前隊員梁志恆，今次就同三位少年組隊參賽，梁志恆憶述，過往每逢大賽前夕，運動員嘅飲食都要按照營養師嘅設定，通常都係少糖、少油同少碳水化合物，控制得比較嚴格，依家退役，飲食就可以稍為放縱一下，不過都好注意自己攝入幾多熱量，唔可以大過體能嘅消耗咁話喎。聽落仲係好健康喎！
卓妮