政情：為買西洋劍裝備 陳積志曾補習儲錢
大部分人喺讀書嘅時候，都唔係咩大富大貴嘅背景，要買自己嘅心頭好，就試過努力儲錢嘞。民政事務局副局長陳積志亦都唔例外，原來佢讀大學嘅時候，因為好鍾意打西洋劍，西洋劍嘅裝備都唔平o架，佢就特登去補習儲錢買添！
陳積志話，自己細個好鍾意運動，參加過田徑隊、排球隊、足球隊，當年西洋劍都唔係咁普及，到大學見到有得學，覺得好新奇，於是就去學吓，仲加入埋校隊添，因為太鍾意，所以都想買一套裝備。
仲參加童軍 生活「好陽光」
佢又講起，當年讀書壓力冇依家咁大，可以擺好多時間做運動，仲參加童軍，去玩露營等野外活動，形容係「過好陽光嘅生活」。佢玩嘅活動聽落真係同民政事務局嘅工作好似好夾咁喎！
不過，佢話自己同好多政務官唔同，從未做過民政事務專員，一做就做民政事務總署，係比較少見嘅情況。