政情：父母畀跳馬王子受訓 貝鈞奇有功
香港「跳馬王子」石偉雄（石仔）近日喺世界盃奪冠，真係香港嘅喜事。港協暨奧委會副會長貝鈞奇早前出席一個活動時講起，自己當年都有份勸石仔家長畀阿仔返內地受訓一年，當年佢嘅家長都有啲猶豫，擔心石仔要放棄一年學業，好彩學校都配合保留佢嘅學位，家長才肯畀佢去咋。
放棄一年學業 犧牲好大
貝鈞奇話，自己當年有份資助石仔去內地集訓嘅經費同開支，當年石仔十三歲，仲好細個，有機會去湖南集訓一年，犧牲真係好大，去到湖南練習時都好孤獨，對一個小朋友嚟講，真係好難捱，不過石仔好乖，向住目標努力，面對困難、受傷、失意都冇放棄，終於得到依家嘅成績。
貝鈞奇話，香港好少小朋友願意堅持去做運動員，加上十個有九個家長都會拒絕畀咁細嘅小朋友休學一年，通常喺香港玩吓當運動就可以，好少人肯循職業運動員方向去訓練，石仔真係好特別嘅例子。