政情:岑智明衝出香港 國際委員會任聯合副主席

近年超強颱風「山竹」、「天鴿」搞到香港七國咁亂添,大家都歷歷在目。天文台台長岑智明前日喺瑞士日內瓦嘅第十八屆世界氣象大會上,獲選為世界氣象組織嘅天氣、氣候、水同埋相關環境服務與應用委員會(服務委員會)嘅其中一位聯合副主席。唔知係咪同岑智明處理得多極端天氣有關,所以因禍得福呢?

話說依個委員會係世界氣象組織新設嘅兩個委員會之一,亦係組織作機構管治改革嘅一部分,主要係負責開發同落實各項全球協調,同埋天氣、氣候、水、海洋及環境相關嘅服務和應用項目,令社會整體作有根據嘅決定,從而造福社會同埋經濟,聽落好似好猛料咁喎。

雨季將臨 天文台長有排忙

對於今次獲選為聯合副主席,岑智明就話覺得深感榮幸,仲話依個服務委員會嘅職能,比起之前擔任主席嘅技術委員會更廣泛,希望未來可以加強世界氣象組織同香港天文台嘅合作喎。講開又講,雨季又差唔多殺到埋身,岑智明多咗嘢做,會唔會分身不暇,搞到畀市民鬧呢?

第一手消息請下載on.cc東網iPhone/iPad/Android/Windows Phone Apps