中環出更：知名度太低？葉建源返立會一度受阻
立法會近期因修訂《逃犯條例》爭議，屢次成為示威者衝擊嘅目標，如非必要都唔會去立法會附近一帶，之不過尊貴嘅議員係例外，其中教育界議員葉建源憶述，自己早前行返立法會途中遇到封路，就遇到警察唔係第一時間認得自己係議員喎。
葉建源話早前受封路影響，要喺中環行返立法會，行到特首辦外添華道一帶，有大量鐵馬攔住，警察第一下唔認得佢係議員，唔畀佢過，不過一秒後就認得嘞，之後仲想幫佢移開啲鐵馬，但鎖得太實移唔開，就此，佢就反建議「不如我爬過去啦」，最終爬過重重鐵馬，成功行返立法會。被問及警察未能第一時間認出，係咪知名度太低？葉笑稱「不嬲都低，少人識啲安全啲」。
劉怡翔因派錢鬧劇「成名」
講開知名度低，有地區人士就大爆，財經事務及庫務局局長劉怡翔向來搞開涉及財經嘅事宜，一般市民平時唔多認得佢，但原來近日四千蚊嘅關愛共享計劃搞到一鑊粥，劉怡翔就反而因禍得福，落區多咗人識。劉怡翔因政策搞得差變成多人識，真係唔知好嬲定好笑嘞！
卓妮