中環出更：孫女考入名校 鄭明明父親節赴美慶賀
就快到父親節，中國人有句說話「百行以孝為先」，為人子女都會抽時間同父親慶祝一下，更加係一個大好機會，一家人一齊聚一聚添，唔少政商界名人都打算嗰日一家人一齊過。好似有「美容教母」之稱嘅鄭明明早前出席一個活動時講起，雖然係父親節，但仔女都好有孝心，一樣會同佢慶祝，將會同佢嘅細女一家人到美國，因為孫女考到入美國嘅名牌大學，順便可以一同慶祝添。聽落都覺得開心呀。
同場又見到杭州香港青年會創會會長沈慧林 （William）同「金錘拍賣官」金鈴，二人都打算喺父親節同家人一齊食餐飯，真係齊齊整整最重要。William話，父親節已經預咗全日時間會留晒畀爸爸，將會一家人去食飯慶祝，仲話咁啱今個星期係佢妹妹同媽媽嘅生日，所以會喺父親節一齊慶祝，仲講笑話，可以慳番兩餐飯喎。
細女攞獎學金 沈運龍話慳唔少
至於金鈴就話，囡囡已經秘密畫咗一幅畫，打算喺父親節嘅時候送畀爸爸，原本幅畫淨係畫咗囡囡同爸爸，後尾囡囡覺得都係一家人開心啲，所以加埋家姐同佢自己一家四口，晚上就預約餐廳食飯，最緊要係一家人開開心心咁話。
轉個頭又見到從事珠寶行業嘅香港中華廠商聯合會常務會董沈運龍，佢話父親節會同太太及兩個囡囡一齊慶祝，今個父親節特別開心，因為細女攞到兩個獎學金，佢話女兒讀書一向好聰明，唔使佢擔心，還講笑說攞到兩個獎學金，即係喺讀書金錢方面幫佢慳番唔少喎。睇佢笑到咁甜，其實女兒成績好就係佢最好嘅父親節禮物啦！
卓妮