好多立法會地區直選議員都話搵地區辦事處好難，尤其係喺公共屋邨搵地方開地辦就更難，之不過，最近一個地辦嘅吉位，唔知班議員會唔會又打崩頭呢？
話說房屋委員會日前提交立法會嘅文件，通知議員喺新界西有一個吉位，可供申請做地辦嘅，若以區議會分界劃分，則屬於逸東邨南。而呢個吉位就喺東涌逸東邨善逸樓地下，面積有十九平方米，月租盛惠三千九百元。
點解會出現吉位？咪就係因為早前鄉事委員會改選囉！本來呢個地辦係屬於東涌鄉事委會主席兼區議會當然議員樊志平嘅，由於鄉委會改選，由黃秋萍接任鄉委會主席，咁樊志平就要交出呢個地辦嘞！
以房委會慣例，地辦係以當區區議員為優先，然後先到立法會議員，而逸東邨南嘅區議員郭平已設有地辦，所以佢已回覆房屋署唔會接手呢個吉位嘞！咁預計第二優先嘅應該就係黃秋萍，而佢都話會考慮接手，事關有地辦可以做多啲服務。若果黃秋萍順利獲批租用呢個地辦，咁班立法會議員就冇得爭嘞！