中環出更：不忿義賣食檸檬 伍穎梅落力終成功
助人為樂，依家唔少人喺公餘時間都會做下義工，幫助有需要嘅人之餘，亦都會令自己另有一番體會。有「九巴金公主」之稱嘅伍穎梅（Winnie）都做咗好多年義工，試過陪獨居長者，亦都試過參與慈善義賣。佢仲自爆曾經喺義賣時被請「食檸檬」，不過因為唔忿氣，佢之後就更加落力，最終都成功賣出物品。
Winnie早前出席一個義工嘉許活動時話做咗義工咁多年，最難忘嘅就係有次參與義賣，幫手義賣一啲路線圖，雖然售價只係每本五元，但都唔係人人都肯慷慨解囊，但佢就因為唔忿氣，屢敗屢試，最終都可以成功賣出。佢又話可能始終係女仔，所以賣嘢都算容易，又話有時做義工可能涉及體力勞動，加上佢每次都落手落腳去做，所以都幾辛苦，但都係會繼續做咁話。
無酬做節目 周永健頭髮都白
香港賽馬會主席周永健笑言，自己最初做義工時頭髮仲係黑色，依家頭髮都白埋，可見佢做咗幾耐。不過佢所做嘅義工就有啲特別，事關本身係律師嘅佢，曾經無酬咁幫一個電台做節目，每集都講一啲法律個案同解答聽眾「烽煙」電話嘅問題。佢話每集節目都要做好多資料搜集，又要預先同主持人講解，聽落都幾多工夫，難怪佢話每做完一集都鬆一口氣喇！雖然咁辛苦，但佢竟然都做咗六十集，真係有毅力。
立法會議員梁志祥、沙田區議員李世榮同新界社團聯會理事長陳勇亦有出席活動。李世榮作為區議員，平時搞社區活動都需要唔少義工幫手，佢話有義工已經幫咗佢十五年咁耐添！佢同義工相處之道就係分配工作要均勻，倘分配不均會有義工呷醋喎。認真搞笑！
卓妮