經過一天辛勞工作，老竇一踏入家門放下公事包，便懶洋洋躺在梳化上休息。
老竇：「媽咪，開飯未呀？今日好熱呀，畀我飲罐可樂降吓溫先啦。」
媽咪：「老竇，就有得食喇！成日掛住飲可樂，唔該你準備開飯，跟手WhatsApp 家姐、細佬。」
媽咪剛說罷，家姐、細佬已及時返抵家。
細佬：「好嘢，有飯食！時間啱啱好。」
家姐：「老竇又瞓着咗！老竇，起身食飯喇！你再郁都唔郁，遲早肥到肚腩大過胸，要着XXL嘅衫，無型又無款。你長期唔郁唔運動，只係食同瞓，會增加患糖尿病同心血管疾病的風險！」
細佬：「家姐講得啱。我今日上體育堂，阿Sir揀咗我入籃球隊，每逢星期一、三、五放學練習一小時，真係夠晒運動量呀。阿Sir仲教我哋，要趁青少年時期郁多啲，做多啲體能活動，養成做運動習慣，為自己身體打好個底，又可以預防疾病。」
細佬：「家姐，我知你返工經常OT，要抽時間做運動好有難度。你知唔知你哋成年人需要幾多體能活動量呢？其實只要每星期做最少150分鐘中等強度帶氧體能活動，例如，行樓梯、做家務同洗車都屬中等強度活動。你可以做呢啲活動郁吓，對你一定無難度。」
家姐：「細佬，你打籃球唔單止郁多咗，仲醒目咗喎！你睇我今個星期日日返工look着波鞋，就知日日都有郁啦。我放工早一個站落車，然後急步行返屋企再行五層樓梯，夠唔夠體能活動量呀？」
媽咪：「老竇，不如我哋飯後一齊散步郁一郁囉！」
職業安全健康局
www.oshc.org.hk