中環出更：探訪病童 王賢訊：要耐心建立互信
好多弱勢社群需要關懷，仁濟醫院領導層尋日出動，登門向獨居長者派福袋。問到有冇做義工，主席王賢訊（Vincent）話細細個就做義工，有段時間受到朋友嘅感染，仲經常去醫院探望病童添！
講起探病童，Vincent話需要好有耐性，事關彼此都係陌生人。佢話最深刻嘅係有次去探望病童，花咗半個鐘時間先可以同個小朋友建立互信，令小朋友展開笑容，點知就係笑咗一下，跟住就有警察入嚟，話幫嗰個小朋友錄口供，嗰時佢先知道小朋友曾受到虐待，當時佢即刻覺得好心痛。佢話喺呢個世界上，小朋友係無價嘅，所以必須畀多啲溫暖小朋友咁話。
梁智鴻林正財送福袋畀長者
安老事務委員會前主席梁智鴻（金刀梁）同現任主席林正財都有參加活動，亦親身送福袋畀長者，見佢哋捧住個福袋咁開心，明顯係樂在其中。金刀梁係秘尿科名醫，亦做過唔少公職，佢話幫人唔淨係講錢嘅，最重要係互助。佢話睇到啲病人逐漸好轉，自己就會好開心，根本唔會睇錢，而見到病人康復就有無比嘅快樂嘞！
轉頭見到仁濟副主席孫蔡吐媚、仁濟當年顧問何德心同總理何沅蔚。原來何德心同何沅蔚係兩父女，孖住一齊探訪長者。問起何沅蔚幾時開始做義工，佢話自細就跟住爸爸一齊去做義工，亦做過好多探訪，佢就喜歡去探啲公公婆婆，同佢哋傾吓偈，講吓笑，睇到啲公公婆婆開心笑，自己就會好開心o架！依家大個嘞，亦會抽多啲時間去做義工，有時夾啱時間，亦會同爸爸一齊出動，佢希望透過做義工，多啲關心同幫助弱勢社群，仲話愛係由心出發嘅。
卓妮