距離立法會暑假休會只剩下約一個月時間，立法會財務委員會每年呢個時候都出現議程「大塞車」。財委會主席陳健波（波哥）尋日喺電台節目中話，今年仲有涉款七百多億元嘅議程未審議，有意加開二十小時會議，不過都要「睇餸食飯」，按照緩急先後，分配多啲時間討論爭議大嘅項目。不過近期立法會氣氛咁緊張，民主派議員好可能會乘機拉布搗亂，屆時會議就算可以繼續舉行，都可能拖到長一長。咁搞法，波哥咪講話「睇餸食飯」，分分鐘飯都冇得食添呀。
